નેશનલ હાઈવે મેનેજમેન્ટ માટે ડિજિટલ સુરક્ષા મજબૂત કરવા NHAI એ NFSU સાથે સમજૂતી કરાર કર્યા
-આ કરારથી નેશનલ હાઈવે ઓપરેશન અને ડિજિટલ પ્લેટફોર્મમાં ફોરેન્સિક વિશ્વસનીયતા વધુ સુદૃઢ થશે: પ્રો.(ડૉ.) એસ.ઓ. જુનારે
ગાંધીનગર। ડિજિટલ સુરક્ષા અને ડેટા સુરક્ષાને મજબૂત કરવા માટે, NHAI દ્વારા પ્રમોટ કરાયેલ કંપની ઇન્ડિયન હાઈવે મેનેજમેન્ટ કંપની લિમિટેડ (IHMCL)એ નેશનલ ફોરેન્સિક સાયન્સિસ યુનિવર્સિટી (NFSU), ગાંધીનગર સાથે સંશોધન, તાલીમ અને કન્સલ્ટન્સી, ખાસ કરીને સાયબર ફોરેન્સિક્સ, ડિજિટલ પુરાવાની અખંડિતતા અને નેશનલ હાઈવે મેનેજમેન્ટને લગતી અદ્યતન તકનીકી એપ્લિકેશન્સના ક્ષેત્રોમાં સહયોગ વધારવા માટે સમજૂતી કરાર (MoU) કર્યા છે. આ સમજૂતી કરાર ઉપર પ્રો.(ડૉ.) એસ.ઓ. જુનારે, કેમ્પસ ડાયરેક્ટર, NFSU-ગાંધીનગર અને IHMCLના ચીફ ઓપરેટિંગ ઓફિસર શ્રી એ. આર. ચિત્રાંશી દ્વારા NHAIના ચેરમેન શ્રી સંતોષ કુમાર યાદવ; IHMCLના ચેરમેન અને મેનેજિંગ ડિરેક્ટર શ્રી વિશાલ ચૌહાણની હાજરીમાં હસ્તાક્ષર કરવામાં આવ્યા હતા. આ પ્રસંગે પ્રો.(ડૉ.) પૂર્વી પોખરિયાલ, કેમ્પસ ડાયરેક્ટર, NFSU-દિલ્હી પણ ખાસ ઉપસ્થિત રહ્યા હતા. પ્રો.(ડૉ.) એસ.ઓ. જુનારે, કેમ્પસ ડાયરેક્ટર, NFSU-ગાંધીનગર દ્વારા જણાવાયું હતું કે, આ સમજૂતી કરારનો મુખ્ય ઉદ્દેશ્ય જ્ઞાન સર્જન, ટેકનોલોજિકલ સ્થિતિસ્થાપકતા અને સંસ્થાકીય ક્ષમતા નિર્માણને વધારવા માટે બે સરકારી સંસ્થાઓ વચ્ચે શૈક્ષણિક અને સંશોધનલક્ષી સહકારની સુવિધા આપવાનો છે. આ સહયોગ જટિલ નેશનલ હાઈવે ઓપરેશન અને ડિજિટલ પ્લેટફોર્મમાં સાયબર સિક્યોરિટી ફ્રેમવર્ક અને ફોરેન્સિક વિશ્વસનીયતાને મજબૂત કરવામાં યોગદાન આપશે. પ્રો.(ડૉ.) એસ.ઓ. જુનારેએ ઉમેર્યું હતું કે, આ સમજૂતી કરાર હેઠળ NFSU CCTV, મલ્ટીમીડિયા વિશ્લેષણ, ઓડિયો-વીડિયો વિશ્લેષણ અને ડિજિટલ તેમજ સાયબર ફોરેન્સિક્સ લેબોરેટરીઓ સહિતની અત્યાધુનિક તકનીકોથી સજ્જ પ્રયોગશાળાઓના વિકાસ માટે IHMCL ને તકનીકી માર્ગદર્શન અને સહયોગ પૂરો પાડશે. વધારામાં, યુનિવર્સિટી સાયબર અને ડિજિટલ ફોરેન્સિક્સ, મલ્ટીમીડિયા વિશ્લેષણ અને સંબંધિત ક્ષેત્રોમાં વિશેષ તાલીમ કાર્યક્રમો પ્રદાન કરીને સાયબર સ્થિતિસ્થાપકતા અને પુરાવાની અખંડિતતાને મજબૂત કરવામાં IHMCLને ટેકો આપશે. સાથે જ, બંને સંસ્થાઓ સંયુક્ત સંશોધન, વિકાસ અને કન્સલ્ટન્સી પ્રોજેક્ટ્સ પણ હાથ ધરશે.
